ILOILO CITY – Ginbasura sang Court of Appeals ang kaso nga gindesisyunan sang Office of the Ombudsman kaangot sa ginapahayag ill-gotten wealth ni anay Iloilo City Mayor Jed Patrick Mabilog .
Ang kaso ang ginpasaka ni anay Iloilo Provincial Administrator Manuel ‘Boy’ Mejorada sang Setyembre 2014.
Ini ang ginalakipan sang Unexplained Wealth, Dishonesty, Grave Misconduct kag Perjury.
Ginreklamo ni Mejorada ang ginapahayag pagtaas sang net worth sang anay alkalde sa P8.9 million sa sulod lang sang isa ka tuig; kapaslawan nga madisclose ang sources sang iya income kag pag-acquire sang financial interest sa private enterprises kag pagkapot sang official position kaangay sang stockholder, kag director sang pribado nga korporasyon.
Matandaan nga ginmando sang Ombudsman ang pagdimiss sadto sa anay alkalde matapos nagwa nga guilty ini sa serious dishonesty matapos napaslawan nga mapaathag ang pagdako sang iya manggad sang 2012 tubtub 2013.
Sa iya Statement of Assets, Liabilities, and Net Worth (SALN), nagwa nga P8.9-million ang gintaas sang manggad sang alkalde humalin sang 2012 nga P59.4 million kag nangin P68.3 million sang 2013.
Matapos wala napaathag sadto ang pagtaas sang income sang alkalde, nagdesisyon ang Ombudsman nga may yara sang ‘malicious intent’ nga taguon ang iya manggad.
Tungod sini, ginkansela ang iya civil service eligibility,retirement benefits, kag ginmando ang perpetual disqualification sa pagpungko sa public office
Samtang, sa ginpagwa nga desisyon sang 19th Division sang Court of Appeals nga napetsahan Hunyo 11, 2021, gindismiss sang Court of Appeals ang kaso nga gindesisyunan sang Office of the Ombudsman, napamatud-an nga wala gintago sang alkalde ang iya 2013 SALN.
Ini matapos nagfile sang counter-affidavit ang kampo sang anay alkalde sa rason nga isa ini ka sahi sang harrassment kag good faith ang pagdeklarar sang iya SALN.
Sa exclusive interview sang Bombo Radyo kay former Iloilo City First Lady Maria Victoria Mabilog, iya ginpahayag nga santo sa ila nabaton nga sang Court of Appeals, natukiban nga ang pagtaas sang manggad sang anay alkalde ang bangud sa iya income bilang certified public accountant kag corporate comptroller sa Canada.
Tungod sini, gingrant sang Court of Appeals ang petisyon sang alkalde kag ginbasura ang desisyon sang Ombudsman bangud sa kakulang sa merito sa kaso.
Suno kay Mrs. Mabilog, tuman ang iya pagpasalamat bangud nagwa ang desisyon sa tyempo sang ila mortal nga kaaway nga si Presidente Rodrigo Duterte.
Napamatud-an suno sa anay first lady nga wala ginluto ang kaso.
“Ang kaso nga gin decisionan sang OMB against Jed was dismissed by the Court of Appeals. As I have always said, Lies may have speed, but truth has endurance.”
