ILOILO CITY- Dako ang pagpati sang pamilya sang Pinoy boxer nga si Carlo Paalam nga masarangan sini nga makuha ang bulawan nga medalya sa Olympics.
Sa interview sang Bombo Radyo kay Michelyn Mae Paalam, utod ni Carlo, iya ginpahayag nga handom kag sakripisyo ang kapital sang iya utod nga isa sadto ka basurero antes nangin isa ka boksedor sa edad nga siyam ka tuig.
Suno kay Michelyn Mae, inspirasyon ni Carlo ang iya pamilya nga apisar nagbulagay ang ila ginikanan, wala man nagakulang ang mga ini nga magsuporta sa ila nga walo ka mag-utod.
Pahayag niya, pagbulig sa pamilya ang iya katuyuan kon ngaa ginsulod sini ang boxing kag amat-amat na ini nga nahatagan sang katumanan.
