ILOILO CITY- Ginpasakaan sang kaso nga sexual abuse sa korte sa New York si Prince Andrew sang Britanya.
Ang nagpasaka sang kaso amo si Virginia Giuffre, isa ka babaye nga nagaalegar nga ginpilit siya sadto para sa isa ka underage sex ni late US financier Jeffrey Epstein.
Ang kaso ginpasaka sa US district court sa Manhattan batok sa defendant nga si Prince Andrew, Duke of York.
Gin-alegar ni Giuffre nga regular siya nga gin-abuso ni Epstein kag ginapahulam siya sa iban nga mga manggaranon nga lalaki para sa pagpakighilawas kag isa na diri si Prince Andrew.
Base sa reklamo, ginpahayag ni Giuffre nga gin-abuso siya ni Andrew sa puluy-an sa London sang socialite nga si Ghislaine Maxwell, 20 ka tuig na ang nakaligad sang siya ang wala pa nakalab-ot sa edad nga 18.
Ini ang nasaad sa complaint:
“Epstein, Maxwell, and Prince Andrew forced (the) Plaintiff, a child, to have sexual intercourse with Prince Andrew against her will.”
Una na nga ginpanginwala sang 61 anyos nga si Andrew ang alegasyon kag nanindugan nga indi niya gani kilala ang babaye.
Sa pihak sini, ginalauman nga mabutang sa alang- alang ang imahe sang British royal family.
Si Andrew ang utod ni Prince Charles kag ikatatlo nga anak nanday Queen Elizabeth II kag Prince Philip.
