Wala nag-apelar kag wala sang gana nga mag-apelar si Iloilo Governor Arthur Defensor, Jr. sa national government agud pahanugutan na ang dine-in services sa Iloilo Province subong nga yara na ini sa Modified Enhanced Community Quarantine (MECQ).
Ang latest nga executive order sang gobernador ang nagasiling nga limitado lang gihapon sa take out and delivery ang operasyon sang mga food establishments sa probinsya.
Kun basehan naman ang omnibus guidelines sang Department of Trade and Industry (DTI), kun ang isa ka lugar ang naka-MECQ, ginapahunugutan na ang dine-in services sa 10% capacity samtang 50% capacity naman sa al-fresco ukon sa open space setting.
Suno naman kay Defensor, ginsandig ang iya nga EO sa omnibus guidelines sang National Inter-Agency Task Force kag suno sa gobernador, “indi ini ma-appeal ang omnibus guidelines, indi maislan.”
Sa kada desisyon suno kay Defensor, may yara sang trade-off — may bentaha kag disbentaha. Ang bentaha suno sa iya nga ginpili sang probinsya amo nga malikawan ang transmission sang COVID-19.
“Para man ini sa dugang nga pag-andam para malikawan ang transmission sa face-to-face dine-in sa enclosed nga mga lugar. Kun sa restaurant ka, mahukas ka sang face mask mo kag daku ang risgo sang transmission,” pahayag sang gobernador.
Ginrason pa sang gobernador nga apisar may barriers sa restaurants kag eateries, indi ini epektibo bangud pigado ang compliance.
Ini nga desisyon sang Iloilo Provincial Government ang baliskad naman sa ginhimo sang Iloilo City Government.
Sa Agusto 16 pa ang implementasyon sang MECQ sa Iloilo City apang nangonseho si Iloilo City Mayor Jerry Treñas sa IATF agud nga tugtan ang dine-in services kag ang personal care services agud hatagan leeway ang mga establisemento nga makabangon man pagkatapos sang isa ka bulan nga ECQ.##
