ILOILO CITY- Mas istrikto kag mas malawig ang proseso sang pagdumala sang syudad sa mga kaso sang COVID- 19 delta variant.
Sa interview sang Bombo Radyo kay Mr. Jeck Conlu, spokesperson sang Iloilo City COVID-19 team, iya ginpahayag nga ang management nagalakip sang Recovered, Positive ukon Active, kag Close Contacts base man sa Executive Order 86 nga ginpagwa ni Mayor Jerry Treñas.
Suno kay Conlu, sa bahin sang Recovered, pagadal-on ang amo nga indibidwal sa quarantine facility, patigayunon ang contact tracing, kag i -reswab ini.
Kun magnegatibo, indi na ini magapaidalom sa quarantine, apang kon magpositibo naman, kumpletuhon niya ang 14 days nga quarantine tubtob nga magnegatibo na ini.
Sa tion nga magpositibo sa gihapon, i-refer ini sa Infectious Disease Specialist para sa nagakaigo nga management.
Sa bahin sang active nga POSITIVE case sang delta variant, i-transfer ang pasyente sa quarantine facility, patigayunon ang contact tracing, i-reswab ini, kag kun negatibo ang resulta,mahimo na ini makagwa sa quarantine facility,apang kun magpositibo, padayunon ang quarantine tubtob magnegatibo na ang resulta, apang kun magpositibo sa gihapon, i-refer ini sa Infectious Disease Specialist.
Sa bahin naman sang CLOSE CONTACT, dal-on ini sa quarantine facility, sunod nga ipaidalom sa swab test, kag kon magnegatibo, dapat kompletuhon niya ang 14 days nga quarantine.
Samtang, kun magpositibo naman, kumpletuhon niya ang 14 days quarantine tubtob nga magnegatibo na ang resulta, apang kon positibo sa gihapon, siya ang i- refer man sa espesyalista.
Sa subong, may yara sang isa lang ka quarantine facility nga exclusive lang sa delta variant cases ang Iloilo City.
