Maisog nga ginpamangkot ni Presidente Rodrigo Duterte kadungan sang iya Talk to the Nation kagab-i kun san-o na bala sya presohon.
Ini ang may kaangtanan sa pagbukas sang imbestigasyon sang International Criminal Court sa drug war killings sa Pilipinas.
Gindirekta niya ang pamangkot kay Chief Presidential Legal Counsel Atty. Salvador Panelo agud suno sa iya, matipon na niya ang iya gamit kag mga pagkaon samtang nagatigulang siya sa sulod sang presohan.
Apang ginpasalig naman ni Panelo nga indi matabo nga presohon si Presidente Duterte bangud wala sang hurisdiksyon ang ICC sa Presidente kag sa war on drugs bangud indi na ini parte pa sang International Criminal Court.
Samtang suno naman kay Presidential Spokesman Atty. Harry Roque, indi si Pres. Duterte ang gina-imbestigahan sang ICC kundi ang ginaalegar drug war sang Pilipinas.
Ang pagproseso sang ICC sang preliminary investigation pahayag niya ang nagalab-ot pa sang tinuig antes matapos.
Sa pamangkot naman kun bala mahimo makasulod ang ICC investigators sa Pilipinas, sabat ni Roque, wala sang may makapilit nga pasudlon ang mga imbestigador sa pungsod para imbestigahan ang mga ginaalegar krimen nga nagakatabo.
Kun sadto nga myembro pa sang ICC ang Pilipinas suno sa natungdan, may yara sang obligasyon ang pungsod nga mag-kooperar apang sa subong nga indi na, indi naman sila pwede magsulod sa Pilipinas para mag-conduct sang imbestigasyon.
Panugyan ni Roque sa mga tawo nga may yara sang reklamo nga paglapas sa tawhanon nga kinamatarong, magpadulong sa piskal kag magpasaka sang kaso.
