Ginpaiway sang Senate finance subcommittee ang deliberasyon sang Commission on Elections (Comelec) para sa proposed 2022 budget bangud luyag sang mga Senador nga sapulon anay sang poll officials ang en banc angot sa pagkonsidera sa pagpalawig sang voter registration period.
Una na ginpahayag ni Comelec chairman Sheriff Abas nga gin-reject sang en banc ang pagpalawig sa voter registration period tubtob Oktubre 31, 2021 bangud sa hugot nga 2022 elections preparation.
Paathag ni Abas, may mga petsa nga indi na mahulag kaangay sang Disyembre 1 tubtob 15 nga schedule para sa loading sang voters data sa vote counting machines.
Kinahanglan man sang Comelec sang bastante nga tinion agud matumod ang numero sang voters sa kada precinct.
Apang kun mapirmahan ang hagna nga nagapalawig sa voter registration sa Oktubre 31, wala sang may mahimo ang Comelec kundi palawigon ang rehistrasyon.
Suno naman kay Senate Minority Leader Franklin Drilon, nasaad sa Republic Act 8189 nga mahimo palawigon ang voter registration kag ginsuportahan man ini sang Korte Suprema sa ruling sang Kabataan party-list vs. Comelec.
