Posible nga mangin state witness ang director sang Pharmally Pharmaceuticals Corporation nga si Linconn Ong agud nga maghatag sang kasanag sa ginaalegar iregularidad sa diin involved ang nasambit nga kompaniya.
Sang ginpamangkot si Senator Richard Gordon nga amo ang chairman sang Blue Ribbon Committee kun bala mahimo nga potential witness si Ong, sabat niya, malapit na ini nga matabo.
“Secret” naman suno sa iya kun bala detained sa gihapon si Ong sa Senado ukon nasaylo na sa Pasay City Jail.
Nagapati ang senador nga may yara sang pagpamahog sa kabuhi ni Ong.
Nahibaluan nga ginmandu sang Senador ang pag-aresto kay Ong bangud sang pagpamalibad sini nga ibuyagyag ang kantidad nga ginhulam sang kompaniya kay Michael Yang, ang anay presidential economic adviser.
Kwestyonable man dugang ni Gordon ang pagbutang kay Yang bilang economic adviser ni Presidente Rodrigo Duterte nga indi man ini Pilipino kundi isa ka Chinese.
Suno sa senador, madamo sang mga Pilipino nga may kapasidad kag abilidad nga mangin economic adviser apang mas ginpili sang presidente nga isa ka Chinese ang magapungko sa nasambit nga pwesto.
Daw kaangay nga nagapanago pa subong si Yang sa underwear ni Atty. Duterte — ang tawag sang Senador sa presidente bangud pahayag niya, ginagamit ni Duterte ang iya pagka-abogado kag indi pagka-presidente agud nga depensahan ang iya mga abyan nga bal-anon kag dakop na nga nagabinutig.
