Ginlaslasan sang chairperson sang Aksyon Demokratiko ang presidential aspirant nga si Ferdinand “Bongbong” Marcos Jr., sa pagpanawagan nga i-suspend ang excise tax sa produkto petrolyo matapos ginpromisa man ini ni Manila Mayor Isko Moreno Domagoso nga kakason ang buwis sa produkto petrolyo sa tion nga magdaog ini sa pagka-presidente sa masunod nga eleksyon.
Si Mayor Isko ang standard bearer sang Aksyon Demokratiko.
Suno kay Ernest Ramel, “idea theft” ang ginhimo ni Marcos ukon pagpangawat sang ideya nga halin sa alkalde sang Manila.
Daw kaangay pahayag niya nga nangawat sang ‘term paper’ ang “rich kid” sang Forbes Park sa imol apang maalam nga bata halin sa Tondo.
Dugang pa niya, nagapanalaytay gid sa dugo sang mga Marcoses ang pagkakawatan kag pagkapeke –humalin sa peke nga war medals sang “Senior” tubtob sa peke nga diploma halin sa Oxford sang “Junior.”
Tubtob subong, wala pa sang komento ang kampo sang mga Marcos may kaangtanan sa nangin pahayag sang partido ni Mayor Isko.
