Ginrekomenda ni Senator Panfilo Lacson nga pasakaan sang kaso nga graft ang anay Department of Budget and Management Undersecretary Christopher Lloyd Lao sa pagpahanugot sa Pharmally Pharmaceutical Corporation nga kuhaon ang minilyon nga kontrata sang gobyerno apisar kulang ang ila financial capacity.
Suno kay Lacson, kinahanglan nga ilakip sang Blue Ribbon committee sa report nga ginlapas ni Lao ang anti-graft laws sang iya gin-authorize ang pag-award sang P13.86 million contract sa Pharmally bisan pa nga may yara lamang sila sang P599,450 nga net working capital sang 2019.
Sa presentation sang senador, ang Net Financial Contacting Capacity (NFCC) ang gina-compute pinaagi sa pag-multiply sang net working capital sa 10, buot silingon, dapat nga ginhatagan lang ang Pharmally sang maximum contract nga P5.994 million.
Apang, ang una nga delivery sang kompaniya sa Procurement Servise sang DBM ang nagabalor na sang P13.86 million.
Ginpahayag sang senador nga ang NFCC ang kabahin sang eligibility documents sang bidders sa idalom sang Government Procurement Policy Board Resolution 16-2020.
