Ginbuyagyag nu Msgr. Meliton Oso, director sang Jaro Archdiocesan Social Action Center, kun ano ka kontrolado sang gobyerno ang Commissions on Elections (COMELEC) sang 1986 EDSA People Power Revolution.
Sa interview sang Bombo Radyo kay Msgr. Oso, iya ginpahayag nga ang panan-awan sang mga tawo sadto sa poll body, indi makabalo mag-isip kag indi kabalo magbasa.
Ini bangud maathag nga nagapamatok ang mga Filipino sa administrasyon sang diktador nga si anay Presidente Ferdinand Marcos Sr.
Suno kay Oso, kontrolado man sini ang tanan nga media kag ang mga impormasyon nga ginawaragwag sa kahanginan.
Makakululbaan man suno sa iya ang mga tangke de giyera sang militar nga kasubong nga mang-atake anuman nga oras.
Apang suno kay Oso, kasubong nga nagpahumok sa mga tagipusuon sang katapo sang militar ang mga pamatan-on nga babaye kag mga madre nga nagluhod pa sa ila atubangan kag naghatag sang bulak.
Pahayag ni Oso, ang pagpalagyo ni Marcos sa tion sang EDSA People Power Revolution, ang maathag nga patimaan nga may sala gid ini nga ginkomiter sa mga Filipino
Nagapati man ang natungdan nga bangud sa kalakasan nga ginhimo ni Marcos, maathag nga isa ini ka diktador, manug-patay tawo, plunderer, kag butigon.
Panawagan niya sa publiko ilabi na sa mga kabataan, tun-an gid ang kasaysayan, kun ano ang kamatuoran sa likod sang EDSA People Power Revolution agud indi na maliwat ang mapin-ot nga nagligad.
