Gin-athag sang Department of Education (DepEd) nga ginadumilian ang pag-utilize ukon paggamit sa mga eskwelahan bilang venue sang campaign rallies ukon activities.
Nahibaluan nga nagpadala sang letter of request si former Iloilo 1st District Representative Richard Garin sa nasambit nga ahensya agud makapatigayon sang campaign rally ang kampo ni presidential candidate Ferdinand ‘Bongbong’ Marcos Jr. sa Guimbal National High School.
Sa interview sang Bombo Radyo kay Leonil Salvilla, spokesperson sang DepEd Schools Division of Iloilo, iya ginpahayag nga sandig sa reply sang central office sang DepEd, gin-reiterate sang ahensya ang ila polisa sa campaign period.
Sandig sa DepEd Order (DO) 048, Series of 2018 ukon ang “Prohibition on Electioneering and Partisan Political Activity,” ginadumilian ang pagpatigayon sang campaign rallies sang mga kandidato sa sulod sang mga eskwelahan bangud indi ini kabahin sang aktibidad sang buluthuan.
