Nakaguluginhawa man sang gamay ang mga driver sang jeep sa syudad sang Iloilo kasunod sang pagpaidalom sa syudad sa Alert Level 1.
Sa sini nga alert level, ginapahanugutan na ang 100% nga seating capacity sa mga salakyan kag kakason naman ang mga plastic barriers.
Sa interview sang Bombo Radyo kay Mr. Raymundo ‘Boyet’ Parcon, presidente sang Iloilo City Loop Alliance of Jeepney Operators and Drivers Association (ICLAJODA), iya ginpahayag nga makabulig man ini bisan paano sa mga driver bangud tuman subong kataas ang presyo sang gatong.
Buot silingon sini suno kay Parcon, madugang-dugangan ang ila nga pasahero kag may madala na nga dugang nga kita ang mga driver.
Apang gin-athag sini nga mayor gihapon nga problema ang nagalumapaw nga presyo sang produktong petrolyo bangud sang una, nagatughong sang P800 kada adlaw ang mga driver apang subong nagatughong na sang tubtub P1,250 kada adlaw. ##
