Nagakabalaka ang mga driver nga halin sa probinsya sang Iloilo kun pila na lang ang bilin sa ila kita sa pagbyahe kun ipatuman na ang Local Public Transport Route Plan (LTPRP) sang syudad sang Iloilo.
Kun mangin epektibo na ang amo nga ordinansa, indi na pagpahanugutan ang mga jeep halin sa mga banwa nga makasulod sa syudad bangud kutob lang sa transport terminals ang provincial jeepneys kag buses.
Si Gary Siva, halimbawa, isa ka driver sang jeep nga halin sa banwa sang Leganes.
Sa interview sang Bombo Radyo kay Siva, iya ginpahayag nga tuman ka lip-ot ang ruta kun tubtub lang sila sa Tagbak Terminal sa Jaro.
Dugangan pa gid suno kay Siva nga madamo man ang units sang jeep nga halin sa Leganes. Subong nga wala pa naimplementar ang LTPRP, 300 pesos lang suno sa iya ang ila nga kita nga madala-pauli apisar nga makalab-ot na sila sa sulod sang syudad kag maka-pick up sang pasahero.
Kun mapatuman na ini nga ordinansa, basi katunga na lang suno sa driver ang ila nga mabulsa kag madala sa pamilya. ##
