Nagpasalig ang Iloilo City Government nga makabaton sang nagakalin-lain nga bulig ang kapin 93 ka mga pamilya nga biktima sang nagluntad nga sunog sa Barangay Old Airport, Mandurriao, Iloilo City.
Base sa pinakaulihi nga data sang Iloilo City Social Welfare and Development Office (CSWDO), 45 ang totally damaged nga mga balay kag 18 naman ang partially damaged.
Sa interview sang Bombo Radyo kay Teresa Gelogo, focal person sang CSWDO, iya ginpahayag nga nakahatag na ang syudad sang tag isa ka sako sang bugas sa tagsa ka mga apektado nga mga pamilya nga yara subong sa evacuation center.
Madamo naman suno kay Gelogo sang mga nagpalab-ot sang bulig naghalin sa nagkalain-lain nga pribado nga sektor sa syudad.
Bastante man sa pagkaon ang mga residente nga yara sa evacuation center.
Ang ginapangayo subong sang mga apektado amo ang construction materials kag cash aide.
Nagpasalig naman ang syudad nga magahatag ini sang P10,000 para sa mga may totally damaged nga puloy-an kag P7,000 naman sa mga partially damaged nga amo ang ginatinguhaan nga mapanagtag sa masunod nga semana.
Nagpahayag man suno kay Gelogo ang Department of Social Welfare Development (DSWD) nga sila ang magahatag man sang bulig sa mga apektado.
Nakig-angot naman sila sa National Housing Authority (NHA) para sa dugang pa nga bulig para sa mga residente.
