ILOILO CITY– Mas madamo pa nga negosyo nga ginatukod sa syudad sang Iloilo subong nga naga amat-amat pa lamang recover ang syudad nagikan sa epekto sang COVID-19.
Sa interview sang Bombo Radyo kay Iloilo City mayor Jerry Treñas, iya ginpahayag nga isa sa madamo nga negosyo sa syudad amo ang BPO companies.
Suno sa alkalde, barato kag estable ang suplay sang kuryente subong kun ikumpara sang nagligad nga tuig.
Dugangan pa nga ‘safe’ ang syudad para sa mga negosyo.
Madamo man suno sa alkalde sang mga graduates ang syudad nga nabudlayan nga magpadulong sa gwa sang pungsod, gani nagatrabaho bilang mga call center agents.
Magluwas sa mga BPO companies, madamo man sang mga real estate projects nga ginatukod.
Ang mga estudyante nga naga eskwela diri ang nagatinir sa mga condominium units.
Sa pihak sang epekto sang COVID-19, sa sulod sang tatlo ka tuig, wala nagpasaka ang syudad sang real estate tax kag lauman nga malawig pa ini sa masunod pagid nga tatlo ka tuig.
Ginkalipay sang alkalde ang maayo nga fiscal management nga nagresulta sang masobra sa P400M nga surplus sang nagligad nga tuig.
