ILOILO CITY – Nagapadayon ang vaccination program sang Iloilo City Veterinary Office sa mga ido sa syudad sang Iloilo.
Subong nga tuig, wala pa sang may na-record nga rabies case sa syudad apang pito na ang napatay sa Western Visayas.
Sa interview sang Bombo Radyo kay Dr. Tomas Forteza, Iloilo City veterinarian, iya ginpahayag nga nagnubo ang vaccination rate sang syudad humalin sang nagligad nga tuig bangud sang restriction sang COVID-19 pandemic.
Sang nagligad nga tuig, naglab-ot gid lamang sa 5, 000 nga mga ido ang natigayon nga nabakunahan sang anti-rabies vaccine.
Subong nga tuig, target sang opisina nga makabakuna sa 70% sang dog population sa syudad agud nga malab-ot ang herd immunity.
Magluwas sa vaccination program, may yara man sang ginapatukod nga dog pound sa distrito sang Mandurriao.
Nagpanugyan naman si Forteza sa publiko nga indi mag-adopt sang layaw nga ido bangud nga kun basehan ang ila data, dako ang posibilidad nga positibo ini sa rabies.
Pahayag dugang ni Forteza, kinahanglan nga mangin responsable ang mga tag-iya sang ido kag indi pagpabay-an ang mga ini nga maglagaw.
Nahibaluan nga subong nga bulan, ginapatigayon ang rabies prevention month.
