Nagpanugyan ang Liga ng mga Barangay sa pila ka kabarangayan sa syudad sang Iloilo nga magpangayo gid sang bulig sa natungdan nga ahensya ukon opisina pag-abot sa problema sa spaghetti wires ukon mga obstruction sa dalan sa nasakpan nga mga lugar.
Ini nga mga isyu nga ginadugangan pa sang iligal nga koneksyon sa kuryente amo ang masami nga ginatumod nga mga problema kun may sunog nga magluntad sa syudad.
Sa interview sang Bombo Radyo kay Punong Barangay Roberto Niño sang Calumpang, Molo kag amo man ang spokesperson sang Liga ng mga Barangay, iya ginpahayag nga Iloilo City Engineer’s Office kag More Electric Power (MORE Power) ang makabulig pag-abot sa nagasinablay lang nga mga wire sang kuryente sa mga barangay.
Ang Anti-Squatting ang Illegal Structures Unit (ASIS-U) naman ang makabulig agud indi na magtinir ang obstruction nga nagapakitid pa gid sang mga footwalk.
Ginpahanumdom man ang tanan nga mga pumuluyo nga naga-jumper gihapon ukon ang mga may iligal nga koneksyon sa kuryente nga mag-apply na sang legal connection sa power distribution utility sa syudad agud makalikaw sa sunog.
Samtang sa Rizal Pala Pala 1, Iloilo City Proper naman, ginpahayag ni Punong Barangay Allain Rey Depatillo nga wala na sang may nagapangisog nga magtakod sang illegal nga koneksyon sa ila nga lugar.
May mga kuntador na halos tanan nga residente suno kay Depatillo bangud mas ginpahapos man ang application para sa legal connection.
Ang ginmuno lang nga problema amo ang nagakabit nga mga wires kag mga telephone wires nga ginapahayag wala naman sang naga-ako kun sin-o ang tag-iya.
