Alang-alang pa subong nga pasakaon ang daily minimum wage sang mga trabahador sa syudad sang Iloilo bangud amo pa lang amat-amat nga nagabangon ang mga negosyante umpisa sang ginbalda ang business sector bangud sang Covid-19 pandemic.
Sa interview sang Bombo Radyo kay Engineer Terence Uygongco, chairman sang Iloilo Economic Development Foundation Incorporated (ILED), iya ginpahayag nga kun piliton gid nga pataason ang sweldo sang mga workers, posible nga madasma liwat ang mga negosyante, indi makasarang, kag mapilitan nga magbuhin sang labor force.
Mas maayo suno sa natungdan kun balansehon anay ini ilabi na subong nga wala pa man sang mayor gid nga epekto sa tanan nga produkto ang asud-asud nga pagsaka sa presyo sang gatong.
Suno kay Uygongco, sang tion nga ginpangsira ang mga negosyo sa kasagsagan sang pandemya, gintinguhaan man sang business sector nga tatapon ang mga workers gani dapat man subong hangpon ang sitwasyon sang mga negosyante.
Indi pa subong sigurado kun may bag-o nga strain sang Covid-19 suno sa natungdan, gani dapat anay nga estudyuhan ini sang maayo.
Magluwas diri suno sa natungdan, may yara man sang ginapanan-aw nga big-time oil price rollback sa masunod nga semana kag ginalauman nga magasunod-sunod naman ini kag makaguluginhawa man ang kadam-an.
Una diri, may mga nag-file sang petition sa national capital region (NCR) nga pasakaon ang ila nga minimum daily wage. Pila sa factors nga gintumod amo ang kagutom, malnutrition, kag padayon nga pagsaka sa presyo sang gatong kag iban pa nga nagapanguna nga kinahanglanon.
