ILOILO CITY – Nagpanawagan ang pila ka mga election watchdog nga dapat nga mag-resign si Sen. Imee Marcos bilang chairman sang Senate Committee on Electoral Reforms sa tunga sang iya alegasyon nga may yara sang natabo nga serious security breach sa election system provider nga Smartmatic.
Suno kay Kontra Daya convenor Danilo Arao, dapat nga mag-resign si Marcos bangud sang delicadeza kag conflict of interest.
Dugang pa ni Arao, tama ka importante ang papel ni Marcos kag indi nila gusto nga mamalisyahan ang ano man nga legislative inquiry nahanungod sa election.
Pahayag dugang ni Arao, may yara sang conflict of interest bangud nagapadalagan ang utod sang senador nga si former Senator Ferdinand “Bongbong” Marcos Jr. bilang presidente sang pungsod.
Amo man ini ang rason suno kay Arao nga nag-request ang Smartmatic nga i-verify anay ang impormasyon bangud lunsay ispikulasyon gid lamang ang mga nagagwa halin sa indi kilala nga grupo nga naga-post sang screenshots sang data kag litrato sa Facebook kag ginapatihan nga indi matuod.
Una na nga ginpanindugan sang Smartmatic nga ang source code kag software sang Automated Election System ang gin-deliver sa Commission on Elections ang nag-agi sa maid-id nga tests diri kag sa luwas sang pungsod kag subong man gin-review sang maayo sang COMELEC kaupod ang mga eksperto kag mga tiglawas sang political parties.
Si Sen. Imee Marcos ang nakita man sa pila ka videos nga daw kaangay nga nagapakalamaot kay Vice President Leni Robredo nga isa sa mga kasumpong sang iya utod suno kay Arao.
Mahimo nga ginahimo niya ini bilang isa ka concerned citizen apang isa siya ka Marcos kag mahimo gid nga mahatagan sang malisya.
Tion na ini suno kay Arao nga hibaluon sang kampo ni Marcos sa diksyunaryo ang kahulungan sang tinaga nga delicadeza.
