Nagapati ang isa ka public health expert nga indi gid dapat magpadasu-daso ang gobyerno sa pagduso sang Alert Level 0 status sa mga lugar sa Pilipinas ukon ang pagkakas sang kadam-an nga mga restrictions bangud may bag-o pa nga mga pamahog nga nagasulod nga mahimo magpadamo liwat sang kaso sang Covid-19.
Isa diri ang ginabantayan subong sa Europa nga amo ang BA.2 subvariant sang Omicron.
Ini nga Omicron version sang virus ang ginakabig na nga dominant sa bilog nga kalibutan kag ginapanan-aw nga may bag-o nga hugnat sang surge sa Estados Unidos bangud sini.
Sa interview sang Bombo Radyo kay Dr. Philip Ian Padilla, isa ka public health expert kag amo man ang vice-chancellor for academic affairs sa University of the Philippines (UP) Visayas, iya ginpahayag nga indi ini makamamatay nga subvariant apang madasig lang nga maglaton sa tawo.
Isa sa ginalantaw rason suno kay Padilla kun ngaa nga madasig ini nga nagdominar sa pila ka pungsod amo ang halog na nga restrictions kag pagkakas na sang fask mask mandate sa ila nga mga hurisdiksyon.
Suno kay Padilla, ang ginapanugyan sa gihapon nga panagang amo ang pagpatublok sang Covid-19 vaccine kag ang pag-administer sang booster shot.
Sa Pilipinas, gintumod sini nga problema ang manubo nga vaccination rate ilabi na sa Bangsamoro Autonomous Region in Muslim Mindanao (BARMM). Kun wala sang immunity ang tawo suno kay Padilla, maga-mutate man ang virus.
Nagapanawagan ini sang dugang nga kampanya agud ma-engganyo man ang Covid-19 vaccination sa rural areas.
FOURTH DOSE SANG COVID-19 VACCINE?
Nag-apply ang Department of Health (DOH) para sa amended emergency use authorization (EUA) para sa pagtublok sang fourth dose sang Covid-19 vaccine para sa mga tigulang kag sa immunocompromised.
Suno kay Padilla, ginapakita sang datos nga mas protektado ang ini nga sektor kag pati man ang health sector kun may yara sang ikaduha nga booster shot.
Ang aplikasyon ang ginsumite na sa Food and Drug Administration (FDA) paagi man sa recommendation sang Vaccine Experts Panel (VEP).
Ini nga second booster ang ginapahayag kinahanglanon lang sang senior citizens kag sang immunocompromised apang indi pa para sa younger population. ##
(Photo courtesy: PNA)
