DUMANGAS, ILOILO – Gintugyan na sang Korte sa Local Government Unit (LGU) sang Dumangas, Iloilo ang gahom sa pagdumala sa Roll-on/roll-off (RORO) Port.
Sa exclusive interview sang Bombo Radyo kay Dumangas Mayor Ronaldo Golez, iya ginpahayag nga may desisyon na sadto ang Korte Suprema nga itugyan sa ila LGU ang pagdumala sa nasambit nga pantalan.
Suno sa alkalde, tuig 2015 pa ang nasambit nga kaso kag subong lang nadesisyunan.
Apang gintugyan sang Korte Suprema sa Regional Trial Court (RTC) ang pagdesisyon sa balayran sang United Dumangas Port Development Corporation nga amo ang sadto anay nagadumala sang pantalan.
Diri kag nagdesisyon si Hon. Judge Vicente Go, presiding judge sang Branch 68 sang Regional Trial Court nga magabayad ang LGU sang P21 million sa United Dumangas Port Development Corporation.
Gin-athag naman sang alkalde nga i-absorb nila sa gihapon masobra 30 ka mga empleyado sang United Dumangas Port Development Corporation agud indi ang mga ini madulaan sang trabaho.
Plano man sang LGU nga magpahamtang sang Transport Terminal ang nasambit nga pantalan.
