Nagpanindugan ang Pulse Asia Research Incorporated nga nagagamit sila sang scientific nga pamaagi sa ila presidential elections surveys.
Ini matapos madamo ang nagkwestyon sa latest nga resulta sang survey sa diin nagnubo ang porsyento ni anay Sen. Ferdinand “Bongbong” Marcos Jr., kag namutikan naman ang pagtaas sang rating ni Vice President Leni Robredo.
Sa latest survey sang Pulse Asia, nagwa nga halin sa sadto anay 60%, nangin 56% na lang ang mga botante nga maboto kay Marcos kung ginhimo ang eleksyon halin sa ika-17 tubtub ika-21 sang Marso.
Samtang, 24% naman ang nagasuporta kay Robredo nga sadto anay yara lang sa 15% sang Pebrero.
Sa exclusive interview sang Bombo Radyo Iloilo kay Ana Tabunda, Research Director sang Pulse Asia, iya ginpahayag nga apisar ini ang resulta sang survey, wala ini nagakahulugan nga ini na ang mangin resulta sang May 9, 2022 elections.
Suno kay Tabunda, dako ang epekto sang mga campaign rally kag pagtambong sa debate agud masanagan ang mga botante sang ila pilion nga kandidato.
Matandaan nga yara lang sa ikaduha nga pwesto si Presidente Rodrigo Duterte sa Pulse Asia survey sa mga una nga bulan sang 2016.
Sa pihak sini, si Duterte sa gihapon ang nagdaog sang amo nga tuig.
