Nagpaathag ang Iloilo Provincial Health Office (PHO) nga wala nagsanto ang data sang Department of Health (DOH) – Epidemiology Bureau kag PHO rason nga wala nadala sa Alert Level One status ang banwa sang Zarraga kag Batad apisar sang mataas nga vaccination rate status.
Sa rekord sang probinsya, consistent nga nagapanguna ang Zarraga sa mataas nga vaccination rate, samtang wala naman nagakawigit ang Batad sa Top 5.
Apang sang nag-isyu ang Inter-Agency Task Force (IATF) sang latest nga alert level status, nabilin sa Alert Level 2 ang duha ka banwa, indi kaangay sa iban nga lugar sa probinsya nga napanubo sa alert level 1.
Sa interview sang Bombo Radyo kay Iloilo PHO head Dr. Maria Socorro Quiñon, iya ginpahayag nga gin-apelar na sa central office ang nasambit nga concern sang Zarraga kag Batad. Gindala man ang banwa sang New Lucena.
Gina-validate na subong ang data suno kay Quiñon agud ma-check ang discrepancies kag mapanubo naman ang alert level status sa amo nga mga banwa agud nga mapahalog man ang restrictions. ##
