NEW YORK – Natumod na sang New York Police Department ang “person of interest” sa mass shooting sa subway train sa Brooklyn, New York, USA.
Ini amo si Frank R. James, 62, nga may address sa Philadelphia kag Wisconsin.
Suno kay Bombo International Correspondent Ludovico Baqueriza, si James ang nagrenta sang U-Haul van sa Philadelphia.
Ang yabi sa van ang nakit-an sa mga kagamitan sa train nga ginapatihan ginapanag-iyahan sang gunman.
Ini ang ginalakipan sang Glock 9-millimeter handgun, tatlo ka ammunition magazines, isa ka hatchet, fireworks kag liquid nga ginapatihan gasolina.
Ang van ang gin-abandona, lima ka blocks ang kalayuon sa Kings Highway station, sa diin ginapatihan nga gin-agyan sang gunman sa subway kag lima ka milya ang kalayuon sa 36th Street station, sa diin nagluntad ang pagpangluthang.
Sa subong, nagapabilin nga at large si James.
May nakit-an man nga videos sa iya Youtube sa diin ginapakamaot sini si New York City Mayor Eric Adams.
Nahibaluan nga nagdangat na sa 10 ang pilason sa nasambit nga pagpangluthang kag 13 naman ang nakasimhot sang aso, nagkalatumba kag nag-panic attack.
