Kadungan sa iya mismo birthday, nakuha ni Vice President Leni Robredo ang endorsement sang Moro Islamic Liberation Front (MILF) kag ang political party sini nga United Bangsamoro Justice Party (UBJP).
Gin-anunsyo ini sang MILF kag UBJP officials lakip na ang pila ka mga katapo sang Bangsamoro Government sa isa ka press conference sa Camp Darapanan sa Maguindanao.
Sang nagligad nga bulan, ginbisita ni Robredo ang Bangsamoro Government Center sa Cotabato City apang sang amo nga tion, ginpahayag nanday Bangsamoro Minister of Education Mohagher Iqbal kag Minister of Interior Naguib Sinarimbo nga indi pa sila preparado sa pag-endorso sang isa ka partikular nga kandidato.
Subong nga adlaw, Abril 23, mismo si MILF chairman kag Bangsamoro Interim Chief Minister Murad Ebrahim, chairman sang UJBP, ang nagbayaw sang kamot ni Robredo.
Ang isa pa sa nagbayaw sa iya nga kamot amo si 2nd District Representative Esmael “Toto” Mangudadatu, kandidato sang UJBP sa pagka-gobernador sa Maguindanao.
Bangud nakuha ni Robredo ang endorsement sang isa ka myembro sang influential nga Mangudadatu clan kag mga lider sang transitional government sang Bangsamoro Autonomous Region in Muslim Mindanao (BARMM), isa naman ini ka makabig huge blow sa kandidatura ni presidential candidate Manila Mayor Isko Moreno.
Ini bangud antes ang endorsement kay Robredo, si Moreno anay ang ginsuportahan ni Mangundadatu. Subong, nag-liso kay Robredo ang suporta sang mamalidha.
Antes sini, nangin aktibo man si Moreno sa pagpangaluyag sa endorsement sang MILF kag BARMM officials. ##
