Nag-atras si House Deputy Speaker Rodante Marcoleta sa pagpadalagan sa pagka-senador. Si Elections Commissioner George Garcia mismo ang nagkumpirma nga nabaton sang COMELEC en banc ang nangin withdrawal papers sang mamalidha.
Suno kay Garcia, tanan nga boto para kay Marcoleta sa Mayo 9 ang kilalahon nga stray kag indi pag-isipon.
Si Marcoleta amo ang representative sang SAGIP Partylist sa Kamara kag kabahin sang UniTeam slate ni presidential kag vice presidential candidates Ferdinand ‘Bongbong’ Marcos Jr. kag Sara Duterte-Carpio.
Suno anay sa Marcos spokesman nga si Atty. Vic Rodriguez, siya ang “first pick” sa ila nga senatorial lineup.
Sa official statement sang opisina ni Marcoleta, ginpahayag sini nga nabasa na niya kun ano ang dalagan sang eleksyon bangud base sa surveys, wala siya nakasulod sa Magic 12. “The fighter in me should also be brave enough to read the writings on the wall. Let’s call a spade a spade,” pahayag sini.
Apisar wala na ini nagapadalagan, nagpasalig ini sang padayon nga suporta sa BBM-Sara tandem, kag sa mga senador sa idalom sang UniTeam kag PDP-Laban slates.
