ILOILO CITY – Nagdangat sa kapin 15 ka mga insidente sang election-related violence ang na-record sang Armed Forces of the Philippines (AFP) kadungan sang pagpatigayon sang election kahapon.
Ang 15 ka mga insidente ang ginalakipan sang tiniruhay kag mga pagpamomba.
Suno kay AFP spokesperson Colonel Ramon Zagala, apisar sang sini nga mga insidente, nangin maayo ang kabilugan nga seguridad sang pungsod.
Dugang pa niya, importante nga nakaplastar ang seguridad sang AFP kag Philippine National Police (PNP) nga gilayon nga narespondehan ang mga hitabo.
Ginakasubo man sang AFP nga may yara sang nataliwan sa amo nga mga insidente.
Sa Buluan, Maguindanao, tatlo ang napatay kag isa ang napilasan samtang may na-record man nga pagpamomba sa Kabacan, Cotabato kag Mangundatu, Maguindanao kag may kinagamo sa iban pagid nga bahin sang Mindanao.
Suno naman kay COMELEC chairman Saidamen Pangarungan, ang ini nga mga insidente ang i-forward sa en banc agud ma-istoryahan kun ano ang mangin tikang sang poll body.
Mahimo suno sa iya nga ideklarar sang en banc nga may yara sang “failure of voting” sa mga pila ka mga polling centers kag indi ang kabilugan nga banwa.
Dugang pa niya, base sa assessment sang COMELEC, mas malinong subong kun ipa-anggid sang 2019.
Nahibaluan nga sang 2019, nagdangat sa 60 tanan ka mga election-related violence.
