ILOILO CITY – Nagpasalig ang pungsod Australia kag New Zealand nga magapadayon ang commitment nga panamion pa ang pagpakig-abyan sa Pilipinas pinaagi sa pabaskog sang kalinong, pagpadako sang resources sang pungsod kag pag-stabilize sang rehiyon.
Suno kay Australian Ambassador to the Philippines Steven James Robinson, na-istoryahan ang sitwasyon sa West Philippine Sea sa nangin meeting kay President-elect Ferdinand Marcos Jr.
Ginpahayag dugang ni Robinson nga gin-istoryahan man nila ni Marcos Jr. ang defense relationship kag joint training program sang Pilipinas kag Australia.
Kabahin man diri ang development assistance relationship.
Ang Australia ang nagagasto sang ginabanta $80 million kada tuig (P4.2 B) agud nga maghatag sang bulig para sa mga residente sang Mindanao.
Ginpahayag man ni New Zealand Ambassador to the Philippines Peter Francis Kell kay Marcos Jr. ang importansya sang relasyon sa pungsod agud nga ma-stabilize ang rehiyon kadungan sang tensyon sa gina-awayan nga teritoryo.
Una na nga ginpahayag ni Marcos Jr. kay Chinese President Xi Jinping nga ang Manila kag ang Beijing ang indi dapat nga magpasugot nga may matabo nga conflict sa tunga sang duha ka pungsod.
