ILOILO CITY – Ginpamatbatan sang korte sa Germany ang isa ka 101-anyos nga anay Nazi concentration camp guard sang lima ka tuig nga pagkapreso.
Siya na ang mangin pinakatigulang nga persona nga ginpasakaan sang kaso bangud sang war crimes sang tion sang Holocaust.
Napamatbatan nga guilty si Josef Schuetz bangud nangin “accessory to murder” sang indi magnubo sa 3,500 ka kaso samtang nga nagatrabaho bilang prison guard sa Sachsenhausen camp sa Oranienburg, sa norte nga bahin sang Berlin sang 1942 tubtob 1945.
Ang nasambit nga pensioner nga nagapuyo na subong sa Brandenburg state ang nagpanginwala sa akusasyon bangud nga wala ini siya sang may ginhimo kag wala man nagtrabaho sa kampo.
Sa ginpatigayon nga trial, ginpahayag niya nga wala siya nakahibalo kun ngaa nga didto siya.
Apang ginpahayag sang presiding judge nga si Udo Lechtermann nga kumbinsido ini nga nagtrabaho si Schuetz sa kampo kag nagsuporta sa pagpamatay nga natabo didto.
Suno sa judge, ginatulok lamang sang pensioner ang mga preso nga gina-torture kag ginapatay.
Ang mga preso nga nagtuyo nga magpalagyo ang ginatiro gani ang mga bantay ang aktibo nga may kahilabtanan sa pagpamatay.
Ang ruling sang korte ang baliskad sa panaysayon ni Schuetz nga 21 anyos pa lamang sang nagtrabaho sa kampo.
Wala ini sang emosyon sang gin-anunsiyo ang iya sentensya.
Suno sa iya, nakahanda siya sang nagsulod sa courtroom sakay sa wheelchair.
Nangin hilway siya samtang nga ginapatigayon ang trial nga nagsugod sang 2021 apang ginpa-iway sang makapila ka beses bangud sang iya kondisyon nga daw kaangay nga indi na mahimo pa nga mapreso bangud sang iya edad.
Suno sa iya abogado, ma-apelar pa sila.
Buot silingon, indi pa mapatuman ang iya sentensya tubtob sa 2023.
Sang ginpatigayon ang trial, naglain-lain ang pahayag sang anay guard kag nagareklamo nga naga-mix na ang iya panumdom.
Suno sa iya, nagtrabaho siya bilang agricultural labourer sa Germany sa halos bilog nga World War II nga baliskad naman sa pila ka historical documents kun sa diin, nakabutang ang iya pangalan, petsa kag lugar kun sa diin siya ginbun-ag.
Pagkatapos sang inaway, ginsaylo si Schuetz sa prison camp sa Russia antes nagbalik sa Germany kun sa diin, nagtrabaho ini bilang mangunguma kag locksmith.
Nahibaluan nga masobra sa 200, 000 ka mga tawo lakip na ang Jews, Roma, regime opponents kag gay people ang gin-detain sa camp humalin sang 1936 tubtob sang 1945.
Linibo ka mga inmates ang napatay bangud sang forced labour, murder, medical experiments, kagutom kag balatian antes ginhilway sang Soviet troops suno sa Sachsenhausen Memorial and Museum.
Masobra pito ka dekada pagkatapos sang World War II, padayon ang pagpasaka sang kaso sang mga German prosecutors batuk sa mga nabilin nga Nazi perpetrators.
Sang 2011, gin-convict man ang anay guard nga si John Demjanjuk bangud nga nangin kabahin sang killing machine ni Hitler.
