ILOILO CITY – Nagsaka pa sa 20 ka mga tawo lakip na ang isa ka bata ang napatay sang naglunsyar ang Russia sang overnight missile strikes sa isa ka residential building kag recreation center malapit sa Odessa, southern Ukraine.
Ang pagpang-atake ang nag-igo sa isa ka housing block nga nagpatay sang 16 ka mga tawo suno sa State Emergency Services sang pungsod.
Apat ka iban pa lakip na ang isa ka bata ang napatay sang nag-igo ang missile sa community center samtang ang ikatatlo nga missile ang nagtupa sa bakante nga lote.
Nagdangat naman sa 38 ka mga tawo ang napilasan.
Suno kay first deputy interior minister Yevhenii Yenin, wala nila ginlauman pa nga may yara sang mabilin nga buhi bangud sang pagpang-atake.
Ginkondenar naman ni Foreign Minister Dmytro Kuleba ang pagpang-atake.
Nagpanawagan man ini sa ila partners nga mag-provide sang modern missile defense systems sa labing madali nga panahon.
Ang isa sa building nga gin-igo sang strike amo ang rehabilitation center nga nagabulong sang Moldovan children nga may masakit.
