ILOILO CITY – Ginkumpirmar sang Pentagon nga napatay ang lider sang Islamic State militant group sa Syria sa ginpatigayon nga US drone strike.
Suno kay Pentagon Central Command spokesman Lieutenant Colonel Dave Eastburn, si Maher al-Agal ang napatay samtang nga nagasakay sa motorsiklo malapit sa Jindayris sa Syria kag kritikal ang isa niya ka top aides.
Ginkumpirmar naman sang Syrian Observatory for Human Rights ang kamatayon ni Agal.
Suno sa Syrian Civil Defense Force, isa ka tawo ang napatay kag pilason ang isa pa sa ginpatigayon nga strike nga nag-target sang isa ka motorsiklo sa gwa sang Aleppo apang wala gin-identify ang mga biktima.
Tuman ka gamay sang impormasyon angut kay Agal nga gintawag sang Observatory nga Islamic State governor sang Levant.
Ang strike ang ginpatigayon lima ka bulan matapos ang US raid sa banwa sang Atme sa northern Syria nga nagresulta sa kamatayon sang overall Islamic State leader nga si Abu Ibrahim al-Qurashi.
Suno sa US officials, si Qurashi ang napatay matapos nga ginpalukpan sini sang bomba ang kaugalingon agud nga indi madakpan.
