ILOILO CITY – Nakabaton sang prestihiyoso nga George Cross award sa United Kingdom ang Pinay nurse nga amo ang labing una nga nagtublok sang COVID-19 vaccine sa bilog nga kalibutan.
Suno kay Bombo International Correspondent Ramil Isogon direkta sa United Kingdom, mismo si Queen Elizabeth II kag Prince Charles ang naghatag sang award sa Windsor Castle kay May Parsons bilang representante sang National Health Service nga amo ang healthcare service sang UK.
Nangin kaupod ni Parsons si National Health Service Chief Executive Amanda Pritchard.
Ginkilala si Parsons sa ginpakita niya nga kaisog sa panahon sang pandemya.
Siya ang labing una nga nag-administer sang COVID-19 vaccine sang Disyembre 8, 2020 nga amo ang ginsuguran sang lapnagon nga COVID-19 vaccine drive sa bilog nga kalibutan.
Suno naman kay Parson, dako nga kadungganan para sa iya ang malakip sa mga tawo nga nakabaton sang award.
