Nagpanawagan ang isa ka opisyal sang Philippine National Police (PNP) nga sa baylo nga magpatigayon sang protesta ukon rallies kadungan sang State of the Nation Address (SONA) ni President Bongbong Marcos sa Hulyo 25, ‘magpamati na lang’ sa iya nga plano sa idalom sang iya nga administrasyon.
Suno kay PNP director for operations Maj. Gen. Valeriano de Leon, mas maayo nga i-monitor sang anti-Marcos protesters ang speech sang presidente agud nga mahibaluan kun ano ang iya nga mga programa sa sulod sang anum ka tuig nga termino.
Apang gin-athag man sini nga mahimo gihapon maka-rally ang protesters sa designated freedom parks.
Gilayon naman nga ginkontra sang Bagong Alyansang Makabayan ang statement ni De Leon.
Suno kay secretary general Renato Reyes, ang SONA amo ang tuigan nga okasyon kun san-o mapalayag sang tawo ang ila nga mga reklamo kag hibubun-ot sa pila ka mga isyu.
Ginpanindugan man sini nga kinamatarong sang tawo nga magpamatok sa gobyerno kag magprotesta kun kinahanglan.
Gin-cite man sini ang pila ka mga problema kun ngaa may ginahimo nga mga protesta: halimbawa, mataas nga presyo sang gatong kag mga balaklon, manubo nga sweldo, wala sang trabaho, mataas nga utang sang pungsod, napabay-an nga sektor sang agrikultura, paglapas sa tawhanon nga kinamatarong, kag kurapsyon. ##
