Minor adjustments na lang ang ginahimo sa mga preparasyon para sa labing-una nga State of the Nation Address (SONA) ni Presidente Ferdinand ‘Bongbong’ Marcos, Jr. sa Hulyo 25.
Sa interview sang Bombo Radyo kay House Secretary General Mark Leandro Mendoza, iya ginpahayag nga mas ginpasangkad ang seating capacity sa Plenary Hall sang Batasang Pambansa Complex rason nga ma-obserbar gid ang social distancing kag mangin komportable ang magatambong.
Ginpakita na sa publiko ang itsura sang plenary hall antes kag pagkatapos sang renovation.
May gin-install man nga ultraviolet germicidal irradiation system sa plenary hall para sa dugang nga protection sa face-to-face SONA.
Plastado naman ang security preparation kun sa diin halos 22,000 ka pulis kag force multipliers ang magasigurado sang seguridad sang magatambong sa SONA.
Wala sang ginhatag nga rason si Mendoza kun ngaa tuman kadamo ang i-deploy nga pulis subong nga tuig apang natural lang ini suno sa natungdan kaangay man sa iban nga nag-agi nga SONA sang iban nga mga presidente.
At least 1,300 guests ang imbitado sa event kag kalabanan ang nakakumpirma naman sang attendance.
Lakip sa kumpirmado nga magatambong amo sanday former presidents Joseph ‘Erap’ Estrada kag Gloria Macapagal Arroyo.
Wala pa man sang sabat sanday former President Rodrigo Duterte kag former Vice President Leni Robredo.
Required ang guests nga mag-presentar sang negative RT-PCR test sa COVID-19 nga dapat gin-take 48 ka oras antes ang event.
