Nagpasalig ang National Historical Commission of the Philippines (NHCP) nga magabulig ini sa pagkay-o kag pagpatukod liwat sa historic sites, simbahan, kag mga estruktura nga nahalitan bangud sa magnitude 7 nga linog nga nagtay-og sa Luzon.
Suno sa NHCP, magaupod ini sa meeting sa Board of Commissioners sang National Commission for Culture and the Arts (NCCA) agud nga diskusyunan ang damage nga natuga sang hitabo.
Sa subong, nagapanawagan anay ang commission sa local governments nga pangsalbaron ang artifacts kag importante nga parte sang mga estruktura nga kinahanglanon para sa pagpakay-o liwat.
Lakip sa naguba amo ang pila ka historic Roman Catholic churches sa Abra.
Guba ang portion sang bell tower kag atop halin sa Santa Catalina de Alejandria Church ukon ang Tayum Church sa Tayum nga natukod sang 1803.
Antes ini nga linog, may mga linog man sang Spanish colonial era nga nagguba sa facade sang simbahan apang nakay-o sang tion sang American occupation.
Sa Bangued, nahalitan man ang isa sa belfries sang San Lorenzo Ruiz Shrine Church bangud sa aftershocks.
Sa historic structures, lakip sa nahalitan amo ang ancestral houses sa Calle Real sa Vigan, ang Sarrat Church, bell towers sang Bantay kag Laoag, kag ang Sarrat heritage municipal hall. ##
