Napabilin sang isa ka pulis ang iya titulo bilang reigning champion sa Karate sa ginpatigayon nga World Police & Fire Games 2022 sa Netherlands.
Siya amo si Police Executive Master Sergeant Junel Perania sang Railway, Lapuz Norte, Iloilo City, kag assigned sa Regional Learning and Doctrine Development Division sa Police Regional Office (PRO) 6.
Masobra 10,000 ang nag-intra sa amo nga kumpetisyon nagikan sa 70 ka nagkalain-lain nga mga pungsod.
May yara sang 63 ka sporting events, lakip na ang crossfit athletics, water polo, kite surfing, kag ultimate fire fighting.
Ginagamit sang World Police & Fire Games 2022 ang sports bilang paagi sa pag-establisar sang encounters sa tunga sang first responders.
Sa interview sang Bombo Rady kay Perania, iya ginpahayag nga sang World Police & Fire Games 2019, siya man ang nagdaog sang gold medal sa Karate.
Suno kay Perania, bata pa lang siya nahanas na siya sa Martial Arts.
Sa pagkamatuod, nakapasakop na ini sa Southeast Asian Games, Asian Games kag World Games.
Ginpahayag sang natungdan nga magluwas sa pagserbisyo bilang pulis sa sulod na sang 26 ka tuig, nagaserbe man siya nga coach sang Philippine Team sa Asian Karate Federation.
Nagpasalamat man si Perania sa hanay sang pulisya nga nagsuporta sa ila agud mangin madinalag-on sa kompetisyon.
