Nakaumpisa na sa training sa Traffic Academy ang duha ka mga batch sang existing traffic enforcers sa syudad sang Iloilo.
Sa interview sang Bombo Radyo kay Public Safety and Transportation Management Office (PSTMO) head Mr. Jeck Conlu, iya ginpahayag nga ginatudlo sa enforcers ang road regulations and ordinances agud nga mahibaluan nila kun ano gid ang ila nga trabaho kag mapaathag man sa mga motorista kun sila ang makalapas sa pagsulundan sa dalan.
Ginapaayo man ang work ethics sang enforcers paagi sa sini nga akademya.
Matandaan nga may ginpirmahan nga memorandum of agreement (MOA) sa tunga sang Iloilo City Government kag selected national government offices para sa pag-establisar sang Traffic Academy nga amo ang magahanas sang enforcer-applicants antes sila ma-konsiderar nga hired.
Magalawig sang 15 ka adlaw ang training ukon maximum sang tatlo ka semana, kag sunod nga iga-subject ang trainees sa written kag physical examinations.
Ginpahayag man sang PSTMO nga maayo ang timing sini nga academy bangud sang Local Public Transport Route Plan (LPTRP) sa syudad kun sa diin importante man nga nakahibalo gid ang traffic enforcers sa pag-manage sang ila areas of assignment.
Pagkatapos sang training suno kay Conlu, may ihatag man nga certificates sa trainees agud magamit man nga credential sa ila pagsulod sa trabaho.
