ILOILO CITY – Nagaplano nga magpatigayon sang imbestigasyon ang pinuno sang Procurement Service sang Department of Budget and Management (PS-DBM) may kaangtanan sa P2.4 billion nga balor sang outdated kag pricey nga mga laptops nga ginbakal para sa Department of Education (DepEd) sang 2021.
Suno kay PS-DBM Executive Director Dennis Santiago, sa idalom sang iya termino, ang PS-DBM ang magakooperar agud nga ma-address ang findings kag recommendations sang Commission on Audit (COA) sa pagbakal sang amo nga mga laptops.
Nahibaluan nga gin-flag sang COA ang pagbakal sang DepEd sang laptop para sa mga mununudlo para sa pagpatuman sang distance learning bangud sang COVID-19 pandemic nga ginakabig nga outdated kag mahal bangud nga may yara man sang mas barato kag mas maayo nga mga option.
Suno pa kay Santiago, magamandu siya sang maid-id nga imbestigasyon sa presyo sang mga items kag subong man sa technical specifications.
Ginpasalig naman niya nga sa tion nga mapamatud-an nga may yara sang wala nagsunod sa layi kag sa procurement rules, indi pag i-tolerate sang ahensya.
Ang mandato sang PS-DBM amo nga pasiguraduhon nga ang procurement process ang transparent kag competitive agud nga malikawan ang mga irregularities.
Kung madumduman, naggwa sa 2021 audit report sang Commission on Audit nga nagbakal ang Department of Education (DEPED) sang P2.4 billion nga balor sang pagalpalon nga mga laptops para sa mga manunudlo.
Santo sa COA report, nasaad nga ini nga laptops ang “outdated” kag “pricey for an entry-level type of laptop”.
Ang nagakadapat kuntani nga numero sang laptops nga baklon ang yara sa 68,500 units apang ginbuhinan kag ginhimo nga 39,583 bangud sa dako nga increase sang inisyal nga estimated cost sang DEPED nga yara sa P35,046 kada unit kag ginhimo ini nga P58,300 bangud sa rekomendasyon sang PS-DBM.
Ang “bulk” orders sang DEPED sang Intel Celeron laptops ang mas mahal pa sa “individual” purchase sang 2021 Apple Macbook Air M1 processor nga may SRP nga ₱57,990.00.
Ang Villman Computers, isa sa major computer suppliers sa pungsod para sa governmemt agencies kag private corporations ang naglista sa Intel Celeron notebooks nga nagabalor lang sang ginabanta ₱14,900.00 tubtob ₱22,000.00 kada isa.
Sa ginpagwa naman nga statement sang DepEd, ang ila ahensya ang nagbaton gid lamang sang laptops nagikan sa PS-DBM.
