Gin-athag sang World Health Organization nga wala naangot sa mga amo ang monkeypox outbreaks.
Kasunod ini sang reports nga ginapang-atake kag ginapang-hiluan ang amo nga mga sapat sa Brazil.
Suno kay WHO spokeswoman Margaret Harris, nagakatabo ang transmission sa mga tawo kag indi dapat pagbasulon ang mga amo.
Sa report sang local media, ginapahayag nga ginabato ang mga amo sa Brazilian cities.
Sa natural reserve sa Rio do Preto, Sao Paulo state, 10 ka amo ang daw ginpanghiluan kag hungod nga gin-injure sa sulod lang sang halos isa ka semana.
Ginadudahan sang rescuers kag activists nga ginpang-atake sila matapos nga nakumpirma nga may tatlo ka monkeypox cases sa amo nga area.
Sa bilog nga kalibutan, masobra na sa 28,100 cases ang nakumpirma kag 12 ang napatay.
Ginpahayag ni Harris nga bisan monkeypox ang pangalan sini, wala ini nagakahulugan nga mga amo ang main transmitters sang balatian kag rason sang current outbreak.
Ginpangalanan ini nga monkeypox bangud una nga na-identify ang virus sa mga amo nga gina-tun-an sa ukon ginatatap para sa research sa Denmark. ##
