ILOILO CITY – Nagdistansya si Commission on Higher Education (CHED) chairperson Prospero ‘Popoy’ de Vera matapos nga naaresto ang iya utod nga babayi bangud sa ginapahayag kaangtanan sa “communist terrorist” operations.
Sang Huwebes, gin-aresto sang si Philippine National Police (PNP) si Adora Faye de Vera sa Quezon City.
Suno sa otoridad, si Adora nga isa ka Martial Law survivor ang isa ka opisyal sang CPP-NPA-NDF kag nagapangatubang subong sang madamo nga kaso lakip na ang multiple murder kag rebellion.
Suno kay De Vera, ginapangamuyo niya nga mangin maayo ang sitwasyon sang ikaayong lawas ni Adora pagkatapos sang pag-aresto sa iya.
Ginklaro niya nga wala niya nakita si Adora sang masobra sa 25 ka tuig sang nagsugod ini sa pag-upod sa underground movement.
Dugang pa niya, wala niya ginasuportahan ang panan-awan kag opinyon sang iya utod mangin ang iya nangin mga akto.
Nagpahayag naman sang suporta si de Vera sa administrasyon ni President Ferdinand “Bongbong” Marcos Jr. kag sa iya nga tikang agud nga ma-untat ang communist insurgency.
Si Adora ang gin-torture sang Martial Law era sa idalom sang rehimen ni Ferdinand Marcos Sr. nga amo ang amay ni President Bongbong Marcos, Jr.
Siya ang lakip sa mga Martial Law survivors nga nag-file sang historic case batuk sa anay diktador sa Federal District Court sang Pennsylvania.
Ang US court ang nagpabor kay Adora kag sa siyam pa ka mga tagreklamo lakip na sanday Celsa Hilao, Danilo de la Fuente, Renato Pineda, Domiciano Amparo, Rodolfo Benosa, Jose Duran, Josefina Forcadilla, Arturo Revilla kag Gerry de Guzman.
Sa subong, preso na sa Calinog Municipal Police Station si de Vera nga nag-claim nga residente sang Barangay Roosevelt, Tapaz, Capiz.
