ILOILO CITY – Nagpasalig si President Ferdinand Marcos Jr. nga hatagan niya sang importansya, suporta kag proteksyon ang mga Pilipino nga ginkabig niya nga bag-o nga baganihan.
Lakip sa mga ini amo ang overseas Filipino workers (OFW), mga manunudlo, kag health workers.
Sa weekly vlog sang presidente, ginpahayag sini, nga hatagan niya sang importansya, suporta kag proteksyon ang mga ini agud nga mahimo pa nila kag mapadayon ang ila nga mga misyon.
Suno pa sa iya, ang mga OFW ang may dako nga contribution sa pungsod ilabi na sang tion sang pandemya.
Subong nga adlaw, magapadulong siya sa Indonesia kun sa diin, makigkita ini sa Filipino communities sa amo nga pungsod.
Gindayaw man niya ang mga manunudlo kadungan sang pagbalik sang face-to-face classes matapos ang halos duha ka tuig.
Kabahin man sang gintawag niya nga baganihan amo ang Gilas Pilipinas nga nagdaog sang damlag lang.
Kung madumduman, personal nga nagpakita sang suporta si Marcos sa hampang sang Gilas Pilipinas batuk sa Saudi Arabia sa ginpatigayon nga FIBA World Cup Asian Qualifiers.
