ILOILO CITY – Nagbisita si US Secretary of State Antony Blinken sa Kyiv agud nga maghatag sang $2 billion ukon P114 billion nga security aid lakip na ang suporta sang Biden administration sa paglaum nga mapabaskog pa ang Ukrainian counteroffensive agud nga maga-isol na ang Russian forces.
Ang ikaduha na nga pagbisita ni Blinken sa Ukrainian capital humalin sang Russian invasion ang kasunod sang gin-report nga progress sa pagtinguha nga mabawi ang teritoryo nga una na nga nasakop sang Russia malapit sa ikaduha nga pinakadako nga syudad sang Ukraine nga amo ang Kharkiv.
Kadungan sang pagpakigkita ni Blinken kay President Volodymyr Zelensky sa iya fortified presidential administration building sa Kyiv, ginpahayag niya nga ang iya pagbisita ang isa ka importante nga tion para sa Ukraine.
Suno naman kay Zelensky, tuman ang pagpasalamat sang Ukraine sa Estados Unidos sa tuman ka dako nga bulig sa ila pungsod.
Nagpakigkita man si Blinken kay Foreign Minister Dmytro Kuleba kag nagbisita sa children’s hospital kun sa diin, nakita niya ang mga kabataan nga napilasan bangud sa pagpamomba sang Russia.
Sa statement naman ni Blinken, padayon nga magasuporta ang Washington sa Ukraine kag gin-anunsiyo ang panibag-o nga $2.2 billion foreign military financing package para sa Ukraine kag 18 pa ka iban nga mga pungsod nga nakita nga at risk sa future Russian aggression.
Ang $1 billion ang iga-allocate sa Ukraine kag ang nabilin ang tunga-on sa Albania, Bosnia kag Herzegovina, Bulgaria, Croatia, the Czech Republic, Estonia, Georgia, Greece, Kosovo, Latvia, Lithuania, Moldova, Montenegro, North Macedonia, Poland, Romania, Slovakia, kag Slovenia.
Ang kwarta ang intended para sa pagdepensa sa soberanya, modernization sang security forces, pagpa-ayo sang partnerships sa North Atlantic Treaty Organization kag pagpabaskog sang kapasidad agud nga mabatuan ang Russian influence kag aggression.
