ILOILO CITY – Maga-umpisa na subong nga adlaw ang public viewing ni Queen Elizabeth II sa St. Giles’ Cathedral sa official residence sang reyna sa Palace of Holyroodhouse sa Edinburgh sa Scotland.
Kahapon, gin-transport ini halin sa Balmoral estate kun sa diin siya ginbawian sang kabuhi.
Suno kay Bombo International Correspondent Ramil Isogon direkta sa United Kingdom, ang auto punebre ang nag-agi sa Aberdeen, Dundee kag Perth antes ginhaya sa Throne Room sang palasyo tubtob karon sa hapon.
Ang hari kag ang myembro sang Royal Family ang nag-upod sa procession sang lungon padulong sa St Giles’ Cathedral kun sa diin, may service nga ginpatigayon.
Bwas nga adlaw, halinon naman halin sa cathedral sa Edinburgh ang reyna padulong sa London para sa state lying.
Ini ang paga-updan ni Princess Anne.
Ihaya ang reyna sa Westminster Hall sa sulod sang apat ka adlaw antes ang state funeral sa Lunes, Septyembre 19.
Sa Myerkules, Septyembre 14, dal-on ang reyna sa Westminster Hall nagikan sa Buckingham Palace pinaagi sa isa ka mahinay nga procession nga paga-updan sang military parade kag members of the Royal Family.
Ang state funeral ang patigayunon sa Westminster Abbey sa Septyembre 19 nga gin-declare na nga Bank Holiday sa bilog nga United Kingdom.
Sa state funeral, magatambong ang royal family, mga senior officials kag anay prime ministers.
May yara naman sang ginpa-in nga lugar para sa mga world leaders nga magatambong.
Pagkatapos sang funeral service, dal-on na ang lungon sang reyna halin sa abbey padulong sa Wellington Arch sa Hyde Park Corner sang London antes ibalik sa Windsor.
Ini ang igabutang sa St George’s Chapel sa Windsor Castle.
Ang hari kag myembro sang Royal Family ang ginalauman nga maga-upod sa procession sa Quadrangle sa Windsor Castle antes pasudlon ang lungon sa St George’s Chapel para sa committal service.
Ang lungon sang reyna ang ipapanaog sa Royal Vault antes ilubong sa King George VI memorial chapel nga nahamtang sa sulod sang St George’s Chapel.
Sa subong, madamo sa gihapon ang nagapalab-ot sang pag-unong sa royal family.
Sa Buckingham Palace, gin-untat na ang pagbaton sang mga bulak bangud tuman nagid ka damo.
Ang gusto pa nga maghatag sang bulak ang gina-abisuhan nga dal-on nalang sa Green Park malapit man sa Buckingham Palace.
