ILOILO CITY – Sa isa ka pinasahi nga ti-on, magkaupod nga nag-atubang sa publiko sanday Prince William, ang Prince of Wales kag Duke of Cornwall kag si Prince Harry, ang Duke of Sussex kaupod ang ila asawa nga sanday Kate Middleton nga Princess of Whales kag Meghan Markle, ang Duchess of Sussex.
Sila ang nagpasalamat sa crowd nga nagpadulong malapit sa Windsor Castle agud nga magpalab-ot sang pag-unong sa kamatayon ni Queen Elizabeth II.
Suno kay Bombo International Correspondent Ramil Isogon direkta sa United Kingdom, ini ang nagtulod sa palamangkutanon kun bala, maayo na ang pagtamdanay sang mag-utod.
Ang duha ka mga anak ni King Charles III ang tuman ka malapit sa isa kag isa apang nagbag-o ang tanan sang nag-desisyon sanday Prince Harry kag Meghan nga ipaiway ang ila royal titles kag nagsaylo sa Estados Unidos.
Wala sang madamo nga interaction ang duha ka mag-asawa sa 40 minutos nga pag-updanay kag nagpondo agud nga magbasa sang mga mensahe nga nabutang sa mga bulak kag nagpangamusta kag nag-istorya sa linibo ka mga tawo.
Kung madumduman, sang Byernes, sa pinaka-una nga address to the nation ni King Charles III, nagpabutyag ini sang pagpalangga kanday Prince Harry kag Meghan.
Iya man nga ginhatag kay Prince William kag Princess Kate Middleton ang titulo nga Prince and Princess of Wales nga una na niya nga nakaptan kag sang iya nagtaliwan nga asawa nga si Princess Diana.
Sa adlaw sang kamatayon sang reyna, natabu-an nga yara sa London si Prince Harry kag Meghan para sa isa ka event.
Indi pa klaro subong kun bala, naabtan pa nila ang reyna antes na-utdan sang ginhawa.
