ILOILO CITY – Nakahanda nga magtrabaho ang China upod sa kaalyado nga pungsod nga Russia bilang “great powers” sa ginpatigayon nga pinakauna nga overseas trip ni Chinese President Xi Jinping humalin sang nagsugod ang pandemya.
Sa ginpatigayon nga leader’s summit sang Shanghai Cooperation Organization sa Samarkand, Uzbekistan, ginpahayag ni Xi kay Russian president Vladimir Putin nga handa ang China nga magtrabaho upod sa Russia bilang mga “great powers” kag magatungod bilang giya agud nga mag-introduce sang stability kag positive energy sa kalibutan nga puno sang pagsalangisag.
Ang Shanghai Cooperation Organization ang ginabug-usan sang China, Russia, India, Pakistan kag apat ka mga Central Asian countries nga Kazakhstan, Kyrgyzstan, Uzbekistan kag Tajikistan.
Suno pa kay Xi, sang damlag lang, nalampuwasan sang China ang impact sang COVID-19 pandemic kag nakasugilanon lamang si Putin pinaagi sa telepono apang napabilin ang effective strategic communications.
Dugang pa niya, tuman ka handa ang China nga gamiton ang pagsinapol sa Shanghai Cooperation Organization agud nga magbaylo sang panan-awan sa international kag regional issues nga pareho nga concern sang Moscow kag Beijing.
Nag-abot si Xi sa Uzbekistan sang Myerkules kag nakig-istorya na kay President Shavkat Mirziyoyev sa pagpadalom pa sang bilateral cooperation kag regional kag international issues nga pareho nga interes sang duha ka pungsod.
