ILOILO CITY – Gin-cremate na sa tatlo ka mga templo ang lawas sang mga biktima sang natabo nga massacre sa Thailand.
Ang mga kabataan nga napatay ang ginpasuksukan sang bayo sang ila gusto nga trabaho kun sila ang magdako, antes gin-cremate sa mga Buddhist temples.
Nahibaluan nga gin-atake sang anay pulis ang Young Children’s Development Centre sa Uthai Sawan nga nagpatay sang 36 ka mga tawo lakip na ang 24 ka mga kabataan.
Ang pamilya sang mga biktima ang nagtipon antes ang cremation ceremony nga nagmarka sang katapusan sang tatlo ka adlaw nga funeral rites.
Ang mga nag-unong ang nagbutang sang mga hampanganan, mga kandila kag stick sang insenso sa atubang sang pictures sang mga biktima sa Rat Samakee temple.
Nahibaluan nga pagkatapos sang massacre, gilayon nga nagmandu si Prime Minister Prayuth Chan-ocha sa government registrars nga i-revoke ang lisensya sang armas sang mga registered owners nga gin-report nga may record nga nagtuga sang pamahog sa sosyodad.
Ang Rat Samakee temple ang nag-cremate sang 19 ka mga lawas sa isa ka simultaneous cremation ceremony kagab-i upod ang duha ka malapit nga mga templo nga nag-cremate man sang lawas sang iban pa nga mga biktima.
