ILOILO CITY – Nagaplano ang foreign minister sang Ukraine nga magpasa sang proposal kay President Volodymyr Zelenskiy nga pormal na nga naga-utod sang diplomatic ties sang pungsod sa Tehran matapos ang sunud-sunod nga pagpang-atake sang Russia gamit ang Iranian-made drones.
Nahibaluan nga naglunsyar ang Russia sang “kamikaze” drones sa Ukraine sang Lunes kag nag-igo sa energy infrastructure kag nagpatay sang apat ka mga tawo sa capital sang Kyiv.
Suno sa Ukraine, ang pagpang-atake ang ginhimo sang Iranian-made Shahed-136 drones apisar nga ginpanginwala na sang Tehran nga nagasuplay sila sang mga drones.
Ginpahayag ni Ukrainian Foreign Minister Dmytro Kuleba nga sigurado ang Kyiv nga himo sang Iran ang amo nga mga drones kag nakahanda sila nga maghatag sang dako nga ebidensiya sa mga European powers sa tion nga may yara sang indi magpati.
Dugang pa niya, nagpadala ang Kyiv sang official note sa Israel nga nagapangayo sang air defense supplies kag kooperasyon sa amo nga sektor.
Wala pa sang sabat nagikan sa Israel.
Una na nga ginpahayag ni Justice Minister Gideon Saar nga wala nadala ang weapon systems kag weaponry sa ila suporta sa Ukraine.
Si Saar ang myembro sang decision-making security cabinet sang Israel.
Apisar nga ginakondenar sang Israel ang Russian invasion sa Ukraine kag paghatag sang humanitarian relief sa Kyiv, nag-untat na ini sa paghatag sang military support bangud sang kahangawa sa padayon nga kooperasyon sang Moscow sa kaiping sini nga pungsod nga amo ang Syria.
