ILOILO CITY – Ginabanta nga 120 ka mga tawo ang napatay kag 100 ang pilason sa stampede sa central Seoul sang nagdinaguso ang linibo ka mga tawo sa isa ka makitid nga street agud nga magselebrar sang Halloween.
Suno sa Fire Department official nga si Choi Seong-beom, ang stampede ang natabo ginabanta 10:22 kagab-i kag madamo sang mga biktima ang natapakan tubtob nga mapatay.
Una na nga ginpahayag sang opisyal nga 50 ang gin-atake sa tagipusuon kag masobra sa 140 ka mga ambulansya ang gin-dispatch sa scene agud nga magbulig sa mga biktima.
Ang distrito sang Itaewon ang isa ka sikat nga destinasyon sang mga tawo nga nagaselebrar sang Halloween sa Seoul.
Nagmandu na si President Yoon Suk-yeol sa mga opisyal nga mag-dispatch sang aid teams kag siguraduhon nga may yara sang bastante nga hospital beds.
Nahibaluan nga ini ang pinakauna nga Halloween nga gin-selebrar humalin sang naglupok ang pandemya sang 2020.
