ILOILO CITY – Ginklaro ni Senator Jinggoy Estrada ang iya una nga pahayag may kaangtanan sa pag-ban sang Korean dramas kag iban pa nga foreign shows agud nga mahatagan sang ligwa ang mga locally-produced content.
Sa iya privilege speech, ginpahayag ni Estrada nga ang maayo nga epekto sang kontrobersiya amo nga nahatagan sang tsansa nga mahambalan ang mga bagay nahanungod sa Philippine entertainment industry.
Ang film industry ang nagakinahanglan indi lang sang suporta nagikan sa gobyerno kundi mangin sa mga nagalantaw sang sine suno pa kay Estrada.
Sang nagligad nga bulan, gin-ako ni Estrada nga nagsulod sa iya paminsaron nga i-ban ang mga foreign shows bangud sang epekto sini sa mga Filipino viewers nga nag-ani naman sang negatibo nga mga komento.
Sa iya mensahe, ginpahayag niya nga subong nga tuig, siyam gid lamang ka mga local movies ang ginpagwa base sa impormasyon nga nakuha niya nagikan sa theater group operators.
Kun ipaanggid sa mga nagliligad nga mga tinuig, nagadangat sa 300 ka mga pelikula ang ma-produce sa isa ka tuig.
Dugang pa niya, ang pag-produce sang isa ka “quality film” ang nagakinahanglan sang P10 tubtob P30 million suno sa chairperson sang Film Development Council of the Philippines nga si Tirso Cruz III.
Bangud sini suno sa senador, dapat nga i-consider sang gobyerno ang pagkakas sang amusement tax, value-added tax kag distribution fee agud nga maghatag sang pabor sa mga producers.
Nagapati si Estrada nga indi ini mangin kapyerdehan sa gobyerno.
Sa tion nga makuha ang mga buwis, mahimo man sa gihapon nga mabawi ini sa tion nga mapanami pa ang entertainment industry bangud nga mapadako ang labor force kag magasanyog ang industriya nga mahimo kuhaan sang mga recoupment tax.
Ginduso man niya ang paghatag sang subsidy program kag iban pa nga benepisyo sa film industry.
Ginhalimbawa sini ang investment sang Ministry of Culture, Sports and Tourism sang South Korea.
Ang proposal ni Estrada ang suportado man sang iban pa nga mga senador kaangay nanday Senator Ramon “Bong” Revilla, Senator Robin Padilla kag Senator Grace Poe.
